TwitterFacebook

IVATO : TAMBAJOTRA MPANONDRANA OLONA ANY ARABIE SAOUDITE RAVA

Roambinifolo mianadahy no indray tra-tehaka. Andian’olona voasaringotra amina fandefasana olona sy fandehanana an-tsokosoko any Arabie Saoudite no voasambotry ny polisy teny Ivato, ny alatsinainy teo. Niray tsikombakomba izy ireo ka nijanona tamin’ny toerana iray.

“Vehivavy 7 no indray tratra tao amina tokantrano iray. Izy ireo taorian’izay no nanondro tsikelikely ireo namany ka nahafeno ny isa ho 12, izay marihina fa teny amin’ny manodidina an’Ivato ihany”, hoy ny avy eo anivon’ny Polisim-pirenena.

Ny iray tamin’ireo vehivavy ireo dia fantatra fa vadina lehilahy efa mifonja any Antanimora, izay voampanga noho ny fandefasana olona an-tsokosoko ihany. Misy ihany koa ireo efa renim-pianakaviana ary tovovavy vao nahazo karapanondro tamin’ity taona ity.

Rehefa niroso moa ny fanadihadiana dia fantatra taty aoriana fa 7 tamin’ireo 12 ireo no efa niomana ny hiondrana any Arabie Soaudite, no sady nanatevina ilay tambajotra. Efa niatrana niaraka tamin’ireo antotan-taratasy ilaina amin’izany izy ireo, raha tsy hilaza afa-tsy ny taratasy mirakitra ny toe-pahasalamana avy amin’ny mpitsabo. Ny 3 mianadahy kosa irakiraka amin’ilay firaisana tsikombakomba. Ny 2 ambiny no fantatra fa atidoha amin’ity fanondranana olona ity. Anio no tokony hiatrika ny fampanoavana izy ireo raha ny fampitam-baovao voaray.

Prisca Ranjalahy

Laisser un commentaire

Votre adresse de messagerie ne sera pas publiée. Les elements en (*) sont requis

*