TwitterFacebook

BETAFO : FANAHIANA HALA-JAZA NIAFARA TAMIN’NY SAVOROVORO SY FIFAMPITIFIRANA

Nafana ny toe-draharaha tao Ambohimasina sy Manohisoa, kaominina roa samy ao amin’ny distrikan’i Betafo, tato anatin’ny 48 ora. Ankizilahy iray mpaka vilona no voalaza fa tafatsoaka avy eny Manohisoa ka nihazakazaka nitantara tamin’ny fokonolon’Ambohimahamasina fa nogiazana tsy tamin-tsitrapo tao amina ivon-toerana, voalaza ho misy mpanao asa soa, izay iandraiketana teratany vahiny, afak’omaly.

«Ireo mponin’Ambohimasina nilaza fa avy nangalarina io zazalahy io saingy tafaporitsaka. Izy ireo ihany anefa no mbola nitantara fa araka ny tatitr’io ankizy io dia mbola misy zazavavikely 5 voatazona an-keriny ao amin’ilay ivon-toerana», araka ny fampitam-baovao voaray avy amin’ny Zandarimaria any Betafo.

Noentin-katezerana sy noentim-po tamin’ny fitantarana nataon’ilay ankizy vokatr’izany ny fokonolona ka niandry kendritohina ny fiara ao amin’ilay ivon-toerana, izay tsy maintsy mandalo eo Ambohimasina alohan’ny hidirana an’i Manohisoa, afak’omaly hariva. Fiara tsy mataho-dàlana iray no nampitain’ny mpitandro ny filaminana fa nosakanan’ireo mponina ary ireo teratany malagasy roalahy tao anatiny kosa no saika niharan’ny fitsarambahoaka. Tonga nandamina ny raharaha anefa ireo mpitandro ny filaminana ary nitondra azy roalahy, saingy namotsotra azy ireo indray rehefa nilaza ho tsy nanana porofo momba ny fanahian’ireo fokonolona. Nihizingizina ny tsy maintsy hisava ilay ivontoerana eny amin’ny kaominina Manohisoa vokatr’izany ireo fokonolon’Ambohimasina ary voatery nanaraka sy nanamarina ny vaovao niely ireo mpitandro ny filaminana.
«Vao nahita ireo andian’olona sy mpitandro ny filaminana nihaodihaody sy nikasa ny hizaha ilay ivontoerana anefa ireo mpiambina dia nitifitra avy hatrany. Teo no vao mainka nihombo ny savorovoro», araka ny fampitam-baovao avy amin’ny mpitandro ny filaminana any Betafo, omaly nanodidina ny tamin’ny 5ora sy sasany.

Nanjaka tanteraka moa ny savorovoro tao Betafo hatramin’ny omaly hariva, tsy mbola fantatra izay naratra noho ilay fitifirana ary nilaza fa mbola mivory mahakasika io savorovoro io ireo mpitandro ny filaminana.

Laisser un commentaire

Votre adresse de messagerie ne sera pas publiée. Les elements en (*) sont requis

*